Biahramthoknak

Kan Bible le Khrihfa Theology ah Pathian Mui Cawnnak (the doctrine of the image of God) hi a biapi ngaingaimi a si. Khrihfa fimcawnnak ah a lam tampi in zoh tawn a si. Sihmanhsehlaw, kei nihcun Pathian Mui timi sullam hi zoh ka duhmi a si. Cun, Pathian Mui le Khrih Jesuh aa pehtlaih ning zong kan zoh lai i, Pathian mui in sermi minung hi zeitindah sualnak nih a hrawh i, zeitindah Pathian nih a tharchuah tthan tihi biapi ngai in zoh ka duhmi a si. 

Biafang: Pathian Mui

Pathian cu Sertu Pathian a si (Gen. 1:1). Minung zong Pathian nih a ser i, Amah mui lo in a ser, “Cuticun Pathian nih minung cu amah mui lo in a ser, minung cu Pathian mui in a ser hna. Mipa le minu kha a ser hna” (Gen. 1:27). Hika Bible i, “Pathian mui” timi hi Miraang ah “the image of God” ti a si. Bible biafang ah a biapi ngaimi a si i, cawn awktlak ngaimi a si. Hi biafang cu Hebrew holh in “tselem” ti a si i, Greek holh in “eikon” ti a si. An pahnih tein “aa lomi thil” (“copy”), asiloah, “i lawhnak” (“likeness”) tinak a si (MacArthur, 1992, p. 45). A sullam cu pakhat le pakhat aa lo mi, asiloah i lawhnak a ngeimi, asiloah, thil pakhat aiawhnak (representation) khi chim duhnak a si (Moo, 2008, p. 117). Biakam Hlun ah Hebrew holh i “tselem” hi a sullam phunphun in rak hman a si. Nain, Biakam Thar ahcun Greek holh i “eikon” hi Jesuh Khrih cu Pathian mui a si, tinak caah hman bikmi a si (Kilner, 2015, p. 114). 

Jesuh: Pathian Mui

Greek holh i “eikon” hi Jesuh Khrih cu Pathian Mui a si, ti chimnak ah hman bikmi a si i, a sullam hi pahnih in chim khawh a si. Pakhatnak cu “aiawhnak” (“representation”) a si i, a pahnihnak cu, “langhnak” (“manifestation”) a si. Cathiang nih, “Khrih cu hmuh khawh lomi Pathian mui a si” a ti (Col. 1:15). Cucaah, Jesuh cu Pathian aiawhtu le hmuh khawh lomi Pathian aa langhnak, asiloah, aa phuannak a si. Jesuh Khrih ah hin hmuh khawh a si lo mi Pathian, Thlarau a si mi cu, tlamtling tein aa phuang i, a lang tinak a si (Phil. 2:5-6; Heb. 1:3). Cucaah, Jesuh Khrih thawng lawnglawng in Pathian hi hngalh khawh le hmuh khawh a si tinak zong a si. Jesuh nih Phillip sin a chimmi bia nih a fianter chin: “Keimah a ka hmutu paoh nih cun ka Pa kha an hmuh ve ko” (John 14:9). Jerry Vine zong nih, “Khrih cu sermi sin ah hmuh khawhmi Pathian aiawhtu le langhtertu a si” a ti (Vine, 1999, p. 189). Jesuh cu a tlamtlingmi Pathian mui a si i, Pathian he aa lo taktakmi kha a si (Heb. 1:3). Pathian a kan hngalhtertu le hmuhsaktu zong a si (John 1:1-2, 18; 10:10). 

Jesuh cu a zungzal in Pathian mui a si. N.T. Wright nih a chimmi cu, “Jesuh cu a zungzal in Pathian mui sinak a ngeimi a si i, Pathian mui sinak in a um zungzal dingmi zong a si. Pa Pathian 2 ziaza le sining (character) tlamtling tein hmuhsaktu a si” a ti (Wright, 1986, p. 74). Jesuh cu Fapa Pathian a si. Pathian sining cu tling khitkhet tein a sin ah a um (Col. 2:9). Thumkomh Pathian ah mi pahnihnak a si. Titsa minung sinak aa lakmi, asiloah, titsa minung ah aa cangmi Pathian a si. Cun, hmuh khawh lo mi Pathian hmuhsaktu zong a si (Col. 2:9). Jesuh nih Pathian a kan hmuhsaknak le hngalhternak thawng in, vawlei nih Pathian ahodah a si ti kan hngalh khawh; kan hmuh khawh (John 10:10; 6:44; 14:6-9; Matt. 11:27). 

Bible lei thiamsang Grant Osborne nih, Colossians 2:9 hrilhfiah ttialmi ah, “Jesuh hmai zoh cu Pathian hmai zoh he aa khat. Mah hi pei Paul nih Jesuh cu hmuh khawh lo mi Pathian mui a si, tiah a chim duhnak si ko cu” tiah a ttial (Osborne, 2016, p. 35). Jesuh cu Pathian mui a si. Pathian he aa lo bikmi a si. A tlamtlingmi Pathian neh (imprint) a si i, Pathian sinak le sining cu Jesuh ah tlamtling tein hmuh a si (John 10:10). Hihi Pathian nih minung a kan ser tikah aa tinhmi le minung ser hnawhchan kan sinak le minung kan sinak sullam a si (Gen. 1:26-27; Rom. 8:29- 30). Pathian nih Amah mui in sermi kan si. Pathian he aa lomi kan si. Vawlei ah Pathian aiawhtu ding le Pathian sinak le sining hmuhsaktu le langhtertu ding kan si (Kilner, 2015, p. 184). 

Minung: Pathian Mui Keng in Sermi 

Genesis 1:26-27 ah, Pathian nih minung cu Amah mui keng in sermi kan sinak fiang tein kan hmuh. Pathian mui kengmi kan si caah Sertu Pathian he a sunglawimi pehtlaihnak (special connection) kan ngei tinak a si. Kilner nih Pathian mui keng in sermi kan sinak hi sullam phun hnih a ngei, a ti. Pakhatnak cu minung hi Pathian thla (God’s reflection) kan si a ti. Adang pahnihnak cu Pathian he sunglawi taktak in pehtlaihnak (connection) ngeimi kan si a ti (Kilner, 2015, p. 116). Cucaah, Fapa Jesuh le sermi minung cu Sertu Pathian he a hleikhun in pehtlaihnak ngeimi le Pathian thla (reflection) kan si. Hihi Pathian mui keng sermi kan sinak a murupi cu a si. Theologian minthang Bavinck nih a chimmi hi a fiang tuk, “Minung si hnawhchan cu Pathian mui keng kan sinak hi a si. Pathian he aa lo in sermi kan si caah a hmasa tein midingfel le mithianghlim kan si” a ti (Bavinck, 2011, p. 317). Steinmann nih a nolh ve, “Pathian mui in minung hi ser kan si caah Pathian he lawhnak ngeimi kan si. Hi ruang ah minung hi Pathian bantuk si aa zuam dingmi kan si” a ti (Steinmann, 2019, p. 57). Ephesians 5:1 ah Paul nih zumtu vialte hi, “Pathian bantuk si i zuam” a kan forh. Cucu a hmasa tein Pathian nih minung rak ser tikah aa tinhmi a si. 

Pathian mui keng in sermi minung nih Pathian sining kan ngei. Cu hna cu khuaruah khawhnak, duhthimnak, chia le ttha thleidan thiamnak, dawtnak, thiannak, le dinfelnak te hna hi an si. Cu lawng si lo in sermi thil vialte cungah nawlngeihnak le uknak te hna zong hi Pathian sining kan ngeihnak an si (Allison, 2016, p. 107; Gen. 1:26-28). Pathian mui keng in ser kan sinak cu, hi sermi vawlei ah Pathian aiawhtu, langhtertu, le hmuhsaktu ding ah a si. Phundang in kan chim ahcun, minung hi Pathian aa langhnak le Pathian aa phuannak kan si. Cun, Sertu Pathian zong sermi minung, Amah mui keng in sermi hna he nuam tein i hawikomh i, dawtnak he hi vawlei ah tlonlen hi ahmasa tein Pathian tinhmi arak si (Wright, 1986, p. 74). 

Cun, Pathian mui keng in sermi kan sinak hi Sertu Pathian he a hleikhun in pehtlaihnak le i hawikomhnak kan ngeih lawng si lo in, sermi minung he i hawikomhnak le pehtlaihnak kan ngeih 3 zong a si chih (Treier, 2017, p. 416; Gen. 1:26-27; 5:1-2; 9:6). Hihi Pathian mui keng in sermi minung cu sermi thil dang vialte he kan i dannak a si i, sermi thil vialte lakah cungnung bik kan si le kan sunlawi an si (Jam. 1:17-18). Bible lei thiamsang Osborne nih minung kan sunlawinak le sermi thil dang he kan i dannak tihin a langhter, “Pathian mui keng in sermi minung cu sermi thil dang vialte hna sin ah Pathian hmuhsaktu le aiawhtu kan si” a ti (Osborne, 2016, p. 35). Cucaah, Pathian mui keng in sermi minung, zumtu cu Sertu Pathian he a hleikhun in pehtlaihnak ngeimi le Pathian hmuhsaktu kan si caah Pathian kan hmuhning, kanmah le kanmah kan i hmuhning, le midang kan hmuh ning hi aa dan hrimhrim awk a si. Pathian mui kengmi kan si. Pathian he aa lo in sermi kan sinak hi kan man taktak cu a si. Kan sunlawinak a si caah kanmah le kanmah zong kan i sunhlawih ding le man kan i ngeihter herh i, a kan i upat ding zong a biapi tuk. Cu bantuk in midang zong, a sinak le an dirhmun ah si loin Pathian mui in sermi an si caah an man kan sunhlawih hna ding le kan upat hmaizah hna ding hi an si ve. 

Pathian Mui: Theological Tuanbia Mit in Zohnak 

Khrihfabu tuanbia ah Pathian Mui he pehtlai in biaraldohnak (debate) an rak ngei bal. A hleikhun in Colossians 1:15 i, Jesuh Khrih cu “Pathian fater” timi hi a si. Alexandria, Egypt in ra mi kum zabu pali-nak theologian Arius nih Jesuh Khrih hi sermi a si, tiah arak cawnpiak. Arius nih a cawnpiak rihmi hna cu Jesuh Khrih hi sermi thil vialte nakin a biapi deuhmi le a ngan deuhmi a si nain, Pathian nakin a hme deuhmi a si, tiah a ti. Nain, hi a cawnpiaknak cu Khrihfabu nih an rak pompiak lo. A.D. 325 ah an rak hlohpiak (Melick, 1991, p. 215). Colossians 1:15 i, “Pathian fater” timi hi Pathian mui in minung ser kan sinak kong a si lo. Jesuh Khrih mui he aa lo in minung hi ser kan sinak kong Cathiang nih cawnpiak a kan duhmi a si. Cun, Jesuh Khrih cu sermi thil vialte nakin a lianngan bikmi le a ttha bikmi a sinak kong a si. 

Cu lawng si loin, Khrihfabu tuanbia ah mi cheukhat nih nu hi Pathian mui in sermi an si lo, asiloah, an si thlu lo, tiah a rak cawnpiakmi an um. Sihmanhsehlaw, kan Bible le khrihfabu tuanbia kan zoh tikah pa le nu cu aa tluk tein Pathian mui in sermi kan si, ti kan hmuh (Gen. 1:27). Pathian mui kengmi kan si caah Pathian rian pekmi ah aa tluk tein ttuanvo zong kan ngei (Matthew, 1996, p. 173). Arius cawnpiaknak zultu Arian thok in nihin kan chan Jehovah’s Witness tiang, Jesuh Khrih cu sermi a si i, Pathian a si lo, tiah cawnpiaktu tampi an um (MacArthur, 1992, p. 46). Nain, khrihfabu tuanbia kan zoh tikah hi cawnpiaknak le zumhnak hi a diklo mi a si i, khrihfabu tuanbia i hruaitu hna nih an hlawtmi a si. Pathian biatak le Khrihfabu tuanbia ah zumhnak dik a simi cu minung lawnglawng Pathian nih Amah mui keng in sermi kan si, ti hi a si (Allison, 2016, p. 321). 

Sualnak nih Pathian Mui a Hrawh 

Vawlei mi vialte Pathian mui kan kennak cu sualnak nih faakpi in a hrawh (Rom. 3:10-23). Matthew nih, “sualnak ruangah vawlei mi vialte Pathian nawlngai lo in kan um i Pathian sunparnak pek kan chambau viar” a ti (Matthew, 1996, p. 164). Hi ruang ah vawlei minung, Pathian Mui 4 kengmi hna nih Pathian aiawhnak, Pathian hmuhsaknak le langhternak cu kan chambaunak a si. Kan nun ah Pathian aa phuang ti lo i, aa langh ti lo. Cu nih cun Pathian nih a hmasa tein arak tinhmi tthatnak si ti lo in thil ttha lo a phunphun lehlam a chuahter. Tahchunhnak, lainawnnak, sal sinak, i vuakdennak, chiatserhnak, thleidannak, le dinfel lonak te hna hi an si. Hi vialte hi Pathian Mui kan kennak sualnak nih a hrawhnak tehte le theipar hna an si (Kilner, 2015, p. 117). 

Sualnak nih Pathian mui a hrawh nain, Pathian he pehtlaihnak ngeimi kan sinak cu a tlau thlu lo. Sualnak nih a hrawk kho lo i, a tlau kho taktak lo. Kan Bawipa Jesuh Khrih thawngin Pathian he aa lo mi kan sinak mui cu a taang peng rih (Kilner, 2015, p. 132-34). Osborne nih, “Pathian mui cu sualnak nih a hrawh. Nain, Jesuh Khrih thawng in mi vialte nih Pathian ahodah si ti hi hngalh khawh a si. Jesuh cu Adam pahnihnak a si i, sualnak le thihnak teitu a si (Rom. 5:12- 21); cun, Pathian mui kan kennak ah kirpitu le lam hmuhsaktu a si” tiah a ti (Osborne, 2016, p. 35). 

Pathian Mui Tharchuahnak le Hmasa Sining in Siternak 

Pathian nih a liannganmi a fimnak le thil ti khawhnak in, Jesuh Khrih, Pathian mui a simi cu, a kan pek (Col. 1:15; 2 Cor. 4:4; John 3:16). Pathian nih a kan dawt caah a Fapa Jesuh Khrih in hmasa sining ah siter tthannak le Pathian mui tharchuahnak lam cu a kan onpiak (Rom. 5:1-20). Sualnak nih a hrawhmi le Adam ah kan thlaumi Pathian mui cu Adam pahnihnak ah Jesuh Khrih ah a tharchuah tthan (Treier, 2017, p. 416; 1 Cor. 15:22). Cucaah, Jesuh Khrih thawng lawnglawng in Pathian mui kan kennak cu tharter khawh tthan a si; hmasa sining ah siter tthan khawh a si i Pathian he aa lo in i thlen khawh tthan a si (2 Cor. 3:10; Rom. 8:29; Phil. 1:6). 

Pathian mui tharchuah tthannak le hmasa sining in siter tthannak ah kan herhmi an um. Pakhatnak cu, kan hrin tthan hmasat a herh (Tit. 3:5; John 3:1-21). Cucu, kan sualnak ngaihchih i, Jesuh Khrih cu kan Khamhtu le kan Bawi ah zumh le cohlan hi a si (Mark 1:15; Rom. 10:13-15; Eph. 2:9; 2 Cor. 5:17). Zeicahtiah, Khrih cu Pathian mui a si i Jesuh Khrih thawng lawnglawng in Pathian mui kennak ah thar tthan khawh a si (Col. 1:15; 2:9). Pathian nih zumtu vialte a kan duhpiak bikmi cu Khrih mui ah i thlen le i tharchuah hi a si. Khrih mui lo chin lengmang in kan i thlennak ah kan herh bikmi cu Amah Jesuh Khrih tthiamtthiam hi a si i, Khrih tel lo in Khrih mui ah i thlen khawh a si lo (Rom. 8:29). Khrih he kan i pehtlaihnak le Khrih ah kan nunnak hrampi thukpi kan chiahmi hi a biapi bikmi le a muru bik a si (John 15:5; Phil. 4:13; Matt. 19:26). 

Pathian mui i tharchuahnak a hrampi si rihmi Thiang Thlarau a si. Paul nih 2 Corinthians 3:17-18 ah Khrih kan zumhnak thawng in hmuhmi Thiang Thlarau cu kan chungah rian a ttuan i, Pathian mui lo chin lengmang in a kan thlengtu a si, a ti. Hi ruangah Thiang Thlarau in kan khah ding a si (Eph. 5:18). Thiang Thlarau hi a ngaihchiatter lo in kan lawmhter ding a si (Eph. 4:30- 32). Thlarau nih a duhmi thil kan kawl, kan ruah i, kan tuah ding a si (Rom. 8:5-6; 1 Cor. 2:14). Cu ti cun Thlarau thei kan tlai i, Pathian mui lo chin lengmang in kan i thleng (Gal. 5:22-23). 

Hrintthannak kan tinco bak in Pathian mui i tharchuahnak, asiloah, i thlennak hi aa thokmi a si. Cun, khrihfa kan nun lamthluan chung vialte ah aa pehzulh i, kan thih tikah, asilole, Khrih Jesuh rak kir tthan tikah a dong dingmi a si. Cathiang zoh hmanh usih, “Ka dawtmi ka fale hna, 5 atu hin kannih cu Pathian fa kan si cang, asinain zei kan lawh lai cu a fiang rih lo. Sihmanhsehlaw Khrih a langh tikah, amah Khrih bantuk cu kan si lai ti kha kan hngalh, zeicahtiah a sining taktak tein kan hmuh lai” (1 John 3:2). Khrih Jesuh a langh tikah, asilole, arak kir tthan tikah, Pathian mui a simi Khrih Jesuh bantuk ah tlamtling tein kan i thleng te lai. Kilner nih tihin a hrilhfiah, “Pathian mui in tharchuahnak le i thlennak cu sunparter kan sinak ah a dong te lai. Pathian mui a simi Jesuh cu Pathian sunparnak in khatmi a si. Cu ti cun minung cu sunparter cangmi kan mipum in kan thawhtthan hlan tiang Patihan mui a simi Khrih Jesuh ah aa thlengmi le aa tharchuahmi kan si” a ti (Kilner, 2015, p. 242). Hihi zumtu vialte hmuitinh le ruahchannak a si ding a si. 

Zumtu Nun le Pathian Mui 

Zumtu a simi paohpaoh nih Khrih mui lo chin lengmang ah i thlen le i tharchuah hi kan i tinh bikmi a si, tihi kan philh lo ding a biapi tuk. Cu dirhmun kan phak nakhnga Khrih tthawnnak kan i bochan lai (Phil. 4:13). Thiang Thlarau in kan khat lai i, kan lawmhter lai (Eph. 5:18). Pathian he pehtlaihnak kan ngei lai. Zumtu hawikom hna he zong pehtlaihnak kan ngei lai. Khrihfabu ah kan i pumpe lai; Pathian pekmi Thlarau laksawng in Bawipa kan rianh lai; Thawngttha kan karhter lai. Khrih tehte ttha kan si lai. Zultu kan ser lai. Pathian kan bia lai i, kan thangtthat lai. Bible relnak, thlacamnak, le rawlulhnak in Pathian he i hawikomhnak caan kan pek lai. Zumtu kan minung hawi zong Khrih mui lo chin lengmang in an i thlen an i remh nakhnga kan bawmh hna lai. Thazang kan pek hna lai i, thlacamnak in kan dirkamh hna lai. Cu ti cun Khrih mui lo chin lengmang in kan i thleng lai, kan i tharchuah lai i, kan tthang lai (Eph. 4:15). 

Pathian mui in sermi kan si caah kan biachim le kan nunzia cu Pathian he aa lo mi an si ding hi biatak tein kan i zuam dingmi a si (Eph. 5:1-3). Cun, midang zong kan bawmh hna ding a si. Pathian mui in sermi minung, kannih zumtu cu Pathian he aa lo mi kan si, Pathian aiawhtu le Pathian hmuhsaktu kan si caah, kan nun ah hmuh khawh lo mi Pathian hi an hmuh awk a si. Pathian lei ah mi vialte hi hruaitu ding kan si, a dontu si loin. Pathian he naihtertu ding kan si, a hlattertu si loin. Cun, Pathian cu ningcang tein, thianghlim tein, le dingfel tein a ummi le rianttuanmi a si caah kannih kan nunnak zong ah a um ve awk a si. 

Biafunnak 

Pathian cu Sertu Pathian a si. Zeizong vialte, hmuh khawhmi le hmuh lomi he Pathian nih a Fapa Jesuh thawng in Jesuh caah a ser hna (Col. 1:15-16; John 1:1-3; Gen. 1:1). Minung zong Pathian nih a kan ser i, Amah mui lo in a kan ser. Cucaah kannih minung cu Pathian he aa lo mi kan si (Gen. 1:26-28). Cun, hi vawlei ah Pathian aiawhtu le Pathian langhtertu le hmuhsaktu kan si. Pathian he a hleikhun in pehtlaihnak le hawikomhnak zong a ngeimi kan si i, minung hawi hna he zong a ngeimi kan si. Cu tluk in a sunglawimi Pathian mui in ser kan sinak cu sualnak nih hrawk ko hmanhseh law, Jesuh Khrih thawng in le Thiang Thlarau rianttuannak thawngin tharter khawh tthan a si. A hlan i kan rak sining ah siter tthan khawh a si. Hihi Bible cawnpiaknak biatak a si i, Khrihfabu tuanbia ah zumtu hmasa hna nih an rak fehtermi le zumhmi a si. 

Reference 

Allison, Gregg R. (2011). Historical Theology: An Introduction to Christian Doctrine. Zondervan. 

Allison, Gregg R. (2016). The Baker Compact Dictionary of Theological Terms. Bakerbooks Publishing. 

Andrew E. Steinmann, Andrew E. (2019). Genesis: An Introduction and Commentary, ed. David G. Firth, vol. 1, The Tyndale Commentary Series. Inter-Varsity Press. 

Bavinck, Herman (2011). Reformed Dogmatics. Baker Academic. 

Grant R. Osborne, Grant R. (2016) Colossians & Philemon: Verse by Verse, Osborne New Testament Commentaries. Lexham Press. 

Kilner, John F. (2015). Dignity and Destiny: Humanity in the Image of God. William B. Eerdmans Publishing Company. 

Lea, Thomas D. and Griffin, Hayne P. (1992) 1, 2 Timothy, Titus, vol. 34, The New American Commentary. Broadman & Holman Publishers. 

MacArthur, John (1992). The New Testament Commentary: Colossians and Philemon. Moody Publishers. 

Mathews, K.A. (1996). Genesis 1-11:26, vol. 1A, The New American Commentary. Broadman & Holman Publishers. 

Melick, Richard R. (1991). Philippians, Colossians, Philemon, vol. 32, The New American Commentary. Broadman & Holman Publishers. 

Moo, Douglas J (2008). The Letters to the Colossians and to Philemon, The Pillar New Testament Commentary. 

William B. Eerdmans Publisher. Treier, Daniel (2017). Evangelical Dictionary of Theology. Baker Academic. 

Vine, W.E and Strong, James (1999). The New Strong’s Concordance and Vine’s Concise 

Dictionary of the Bible: Two Bible Reference Classics in One Handy Volume. Thomas Nelson.

Wright, N.T (1986). Colossians and Philemon: An Introduction and Commentary, vol. 12, Tyndale, New Testament Commentaries. InterVarsity Press.