Evangelism & Mission Department nih aa tinhmi cu ram chung ram leng ah Khamhnak Thawngtha phakternak, thlarau tlau tlaihnak, Khrih zultu sernak, le miharsa bawmhchanhnak hi a si. Cun, khrihfabu chungah miharsa, mizawfaak, le Pathian leiah ṭhithruai, zohkhenh, le thlacampiak herhmi an um tikah a herh ningin rian a ṭuantu zong kan si i, khrihfabu nih mission rian kaupi kan ṭuan khawh nakhnga le mission rianṭuan duhnak lungthin kan ngeih khawh nakhnga khuakhangtu, tlangtlatu, hruaitu, thlacamtu, le ṭuanvo latu kan si. 

Bawipa nih Khrihfabu a dirhhnawhchan cu a sunparnak caah a si. Cu a sunparnak cu Khrih Zultu Sernak (Making Disciples of Christ), Khrihfabu dirhnak (Church Planting), Vawleicung Khuazakip ah Khamhnak Thawngttha phakternak (Evangelism), Hell ah kalmi thlarau tlau tlaihnak (Soul Winning), Khrih Zultu Sermi Zultu Nun Sersiamnak (Equipping & Training), le Missionary thlahnak (Sending Missionary) in langhter hi kan i hmaithlakmi le kan thlacamnak a si. 

Children Ministry 

Farm Chin Baptist Church i Children Ministry nih aa tinhmi cu Pathian Sunparnak caah ngakchia nih Bawipa Jesuh Khrih thawngin Khamhnak an hmuh i; Khrih nun ziaza dawh in a ṭhan nakhnga Pathian Bia le hla in fimchimh, cawnpiak, le ṭhithruai le; Khrih Zultu Sermi Zultu le Pathian caah rian ṭuantu ṭha an si nakhnga timhlamh (equip) a si. 

Isaiah 43:7; 1 Corinthians 10:31; 1 Timothy 2:4; 2 Peter 3:8; Ephesians 2:8-10; Proverbs 22:6; Galatians 5:22; Ephesians 4:11; Matthew 28:19-20; Mark 16:15; Psalm 78:4, 6-7; Joshua 24:15. 

Youth Ministry 

Youth Ministry nih aa tinhmi cu Khrihfabu chung mino vialte nih Khamhnak an hmuh nakhnga mino dihlak sin ah Khamhnak Thawngttha aupi a si. Cun, Khamhnak a hmu cangmi zumtu Khrih muisam cuang in an tthan nakhnga, Pathian dawmi, Pathian nawlngaimi, le Pathian ttihmi mino an chuak hnga; kan khrihfabu chung in Khrih Zultu Sermi Zultu le hruaitu ttha tampi an chuah nakhnga hi aa hmaithlakmi a si. 

Deacon Ministry 

Deacon Ministry nih aa tinhmi cu Pastor rian bawmh a si. Khrihfabu chungah a lamkip in, a bikin chiat ni le ṭhat ni ah rianṭuan le zohkhenh a si. Cun, Khrihfabu Pathian Biaknak le Thangṭhatnak (worship), Khrihfa fimcawnnak (Christian education), Khrihfabu riantuannak (church ministry) le Pastor riantuannak (pastoral ministry) ah thazang chuahtu bik an si. 

Women Ministry 

Women Ministry nih aa tinhmi cu Khrihfabu chung nu vialte nih Pathian dawtnak an theih i, taksa, thinlung, le thlarau in an dam/ṭhan nakhnga rianṭuan a si.  

Music, Media, Worship Ministry 

MMW Ministry nih aa tinhmi cu Music, Media, le Praise & Worship in Pathian sunparnak pek a si. Cun, Pathian nih a kan pekmi music thilri a zohkhenhtu le fimtawltu an si. Online cawlcanghnak Khrihfabu website, YouTube channel le social media pages tibantuk zong ṭuanvo latu, pumhnak ah PowerPoint tlaitu, Livestream thlahtu, hmanthlak le video camera lei ṭuanvo latu le sound system mixer tlaitu (ṭhingtu) an si. Khrihfabu chung i music, media, worship, le hla lei ṭhanchonak ah hruaitu bik an si. 

Building & Property Ministry

Building & Property Ministry nih aa tinhmi cu Bawipa nih a kan pekmi biakinn zohkhenhtu ttha sinak (good stewardship) in Pathian sunparnak langhter a si. Cu lawng si loin, Bawipa nih a kan pekmi khrihfabu thilri zohkhenhtu le kilvengtu zong an si. Biakinn hmun le pawngkam zohkhenhtu, thianhtu, le khrihfabu thil aa rawkmi remhtu zong an si. 

Prayer Ministry 

Prayer Ministry nih aa tinhmi cu Khrihfabu member dihlak thlacamnak le rawlulhnak ah hruai a si. Cu lawng si loin Khrihfabu member dihlak thlacami kan si nakhnga le, thlacam duhnak, le thlacam biapitnak a pemh kan si nakhnga, hruaitu le ttuanvo latu an si. Khrihfabu thlacamnak le rawlhnak paoh hruaitu le misawmtu zong an si. 

Sport Ministry 

Bawipa nih minung a kan ser tikah taksa, thinlung, le thlarau in a kan ser. Cucu, Sport Ministry nih aa tinhmi cu lentecelhnak (sport) in Bawipa sunparnak langhter a si i, khrihfabu sport celhnak paohpaoh hruaitu le tlangtlatu an si. Cun, khrihfabu sport day, khrihfa min in sport zuamnak, le sport he pehtlai in Civui kalnak tibantuk zong hruaitu le tlangtlatu an si. 

Nunphung le Zatlang Committee

Bawipa nih a kan pekmi Lai ca, holh, nunphung, zatlang nun, thilthuam, le kan tuanbia tthanchoter, runven, le zohkhenh hi an i tinhmi a si. Cun, biapi ngai in aa hmaithlak rihmi cu kan ram thumnak tthangmi kan mino hna Lai ca le holh thiamter; Lai nunphung le zatlang nun tlaihchanter; kan tuanbia hngalhter le ram le miphun dawtnak ngaihter hi a si. 

Safety & Security Committee 

Pathian biaknak le thangtthatnak biakinn ah mipi le kan fa le an himnak ding le biakinn chungah aa dawhcahlo mi thil zeihmanh um nakhnga lo a lam kip in thazang chuah le pumpek hi an i tinhmi a si.