Then 1: Bible Thiang (The Holy Bible) 

Bible ca dihlak (uk 66) hi, Thiang Thlarau rianṭuannak le fim chimhnak in, minung nih an ṭialmi ṭhawnnak (inspiration) petu a si; a chung biafang hna hi, a dihlak in Pathian thawchuah hnawhmi an si; Bible cu Khrihfa zumhnak hram (source) le zumhnak lam hmuhsaktu a si tiah kan pom 

(2 Tim. 3:16; Heb. 4:12; Gen. 1:27; Ps. 8:3-6; Is. 53:6; 59: 1-2; Rom. 3:23; John. 2:25; Rev. 20:15). 

Then 2: Pathian (God) 

A nungmi, a dikmi, Pathian pakhat lawng a um. Amah cu a mah tein a ummi, nawl ngeimi, a tlingmi, tongh le hmuh khawh lomi, rihma ngeilo, dongh thiam lo, zeizong sertu a si. Pathian nih van le vawlei, sermi thil vialte le minung tuanbia zong hi a huham in a uk dih. Pathian cu Jesuh Khrih zumhnak thawng in fa i a cangmi hna sinah Pa a si i, mi vialte sinah pa nih a fale cung i a ngeihmi zawnruahnak a ngei. Pathian cu a ṭhawngmi, zeizong vialte tuah kho tu (omnipotent) le zeizong vialte a hngal kho tu (omniscient), khuazei poah ah a um kho mi (omnipresent) a si i mi vialte cung ah thleidannak um loin dawtnak a ngei tiah kan zumh. 

Jer. 10:10; Psalm 90:2; Gen. 1:1, 26-27; Is. 42:5; Matt. 28:19; 2 Cor. 13:14; Job. 38:4-7; Matthai 6:26; Salm 103:13; Daniel 4:35; Salm 139:1- 4; 1 Johan 4:8; Rom 5:8; Salm 33:5.

Then 3: Thumkomh Pathian (Trinity) 

Kan biak mi Pathian cu pakhat lawng a si i, mi pathum (three persons), sinak pakhat (essence) a ngei mi — thumkomh Pathian (Triune God) a si tiah kan zumh. Amah cu Sertu, Khamhtu, le zeizong vialte Uktu—a nung mi le a thianghlim mi a si tiah kan zumh. Thumkomh Pathian cu Khrihfa zumhnak hrampi a si i, hi zumhnak lo cun Khrihfa biaknak dik a um kho lo ti zong kan zumh. Zeicahtiah, Bible nih Pathian cu pakhat lawng a um i, Amah cu Pa, Fapa, le Thiang Thlarau a si tiah fiang tein a kan chimh.

Genesis 1:26; Matthai 3:16- 17; Matthai 28:19; Lamkaltu 2:32-33; Johan 10:30; Deut. 6:4; Isaiah 45:5- 6; 1 Tim. 1:5. 

Then 4: Fapa Pathian: Jesuh Khrih (God the Son: Jesus Christ) 

Jesuh Khrih cu Pathian Fapa, minung sin ah aa phuang mi Pathian Bia (the revealed

Word of God) a si tiah kan zumh. Amah cu Thiang Thlarau thawng in ngaknu thiang

Mary chung in a chuak i minung sinak aa laak mi a si. Jesuh Khrih cu Pathian sinak le minung sinak tling a ngei mi a si nain, sualnak a ngei lo mi a si tiah kan zumh. Jesuh Khrih cu misual vialte nih zungzal nunnak kan hmuh nakhnga vawlei ah thi ding in a chuak tiah kan zumh. Mi sual vialte ca ah vailam ah thah a si i, Pa Pathian ṭhawnnak thawng in nithum nak ah thihnak in thawhter ṭhan a si i, ni hmanung bik ah a ra ṭhan lai ti zong kan zumh. 

Johan 1; 14:9; Filipi 2:6-8; Hebru 4:15; Johan 1:29; Efesa 1:7; Rom 5:6, 8; 1 Korin 15:14, 17; Johan 14:1- 3; 1 Thes. 4:17. 

Then 5: Thiang Thlarau Pathian (God the Holy Spirit) 

Thiang Thlarau cu thumkomh Pathian lak ah mi pakhat (person) a si i Pathian sinak

tling a ngei mi a si tiah kan zumh. Thiang Thlarau cu Pa le Fapa he an sinak (essence)

ah siseh an dirhmun (status) ah siseh aa tluk mi a si. Thiang Thlarau cu biatak kan hngalh khawh nakhnga minung thinlung mit a autertu a si. Minung kha an sual a hngalhter hna i Khamhtu sin an phanh nakhnga a kawh hna. Thiang Thlarau cu zumtu hna nih Pathian sunparnak ca i rian tuan ding ah Thlarau laksawng a petu zong a si.

1 Korin 12:4-11; Efesa 4:11-12; 1 Peter 4:10. Matthai 28:19; Johan 15:26; Johan 16:8; 3:6.

Then 6: Minung Sernak (Humanity) 

Minung cu Pathian muisam lo in sermi kan si. Asinain, Pathian kan doh caah sualnak ah kan tlu. Cucaah mi vialte mi sual kan si. Mah le mah aa khamh khomi kan si lo. Pathian biaceihnak tangah kan um. Pathian he pehtlaihnak thawng in zungzal nunnak co ding kan i ruahchan. Pathian he pehtlaih lo ahcun zungzal hell ram co ding asi tiah kan pom (2 Tim. 1:13; 3:16-17; 2 Pet. 1:20-21; Psalm. 119:105, 160; Prov. 30:5,6; Is. 55:11).

Then 7: Khamhnak (Salvation) 

Minung cu sual thawnnak tang ah a um mi kan si caah cu sualnak chung in kanmah tein

chuah khawhnak le i khamh khawhnak lam kan ngei lo tiah kan zumh. Pathian nih minung a kan dawt tuk caah a Fapa ngeihchun kha vawlei ah a run thlah. Khamhnak cu mi vialte caah a lak tein Pathian nih a kan pek. Fapa Jesuh Khrih a zum i a cohlang mi poh cu khamh an si. 

Eph. 2:8-9; Gal. 3:26; Rom 3:9-11, 23; Johan 3:16; Efesa 2:8; Rom 5:16. 

Then 8: Khrihfabu (Church) 

Khrihfabu cu Greek biafang ekklesia in a ra mi a si i a sullam cu “kawh auh mi” (the ones called out) tinak a si. Phun dang in chim ahcun, khrihfabu cu Pathian nih a dang tein thleidan mi, a siloah thianhlimter mi, zumtu hna an i hawikomhnak a si. Khrihfabu cu Jesuh Khrih pum a si i, Khrih thisen in tlanh cia mi zumtu hna hmun khat ah an i hawikomhnak a si tiah kan zumh. Khrihfabu i a hrampi cu Jesuh Khrih a si i khrihfabu lu bik cu hrampi a si mi amah Jesuh Khrih a si tiah kan zumh. Cucaah, khrihfabu i Bawi bik cu Jesuh Khrih a si.

1 Peter 1:19; 1 Korin 6:20; Efesa 4:16; 1 Korin 3:11; Kolose 1:18; Efesa 2:20; Matthai 16:13-19. 

Then 9: Khrihfabu Phung Pahnih (Two Ordinances of the Church) 

Baptist khrihfabu nih Tipil innak (Baptism) le Bawipa Zanriah (The Lord’s Supper) cu

phung pahnih ah kan cohlan. Zultu hna chan in khrihfabu nih upat ṭihzahnak he hman lengmang mi phung an si. Phung tiah kan tinak cu, kan Bawipa Jesuh Khrih nih nawl a kan pek mi an si caah a si (Matthai 28:19; 26:26-30; Luka 22:19; 1 Korin 11:24-25).

1. Tipil Innak (Baptism)
   1. Tipil in hi, Bawipa Jesuh Khrih cu ka Bawipa le ka Khamhtu asi tiah a cohlangmi hna nih, sual ngaihchihnak, sual ngaihthiamnak, Khrih thihnak le thawhthannak ah ka hrawm ve lai timi ruahchannak a langhtertu hna caah hmanmi a si. 
   2. Jesuh zong luphum in tipil a in bantuk in, a ngandammi caah cun luphum tipil pek a si lai (Matt. 3:11).
   3. Tipil in duhmi an um tikah, pastor he ton, cawnpiak le ceihkhan hmasat hnu le lung a tlin cio tik lawng ah tipil innak ngeih a si lai.
   4. Ngakchia bawhte tipil pek hman a si lai lo. 
2. Bawipa Zanriah (The Lord's Supper)
   1. Bawipa Zanriah cu, kan caah Bawi Jesuh Khrih a tem innak, a thihnak le thawhthannak hngalh camcinnak caah hmanmi a si (Matt. 26:26-30; Mk. 14: 22-26; 1 Cor. 11:23-27). 
   2. Thla fatin a zarhkhatnak Zarhpini ah hman a si lai.
   3. Zeimaw ruangah relremlonak a um sual ahcun, a remmi ni zarhpi dang ah hman asi lai.
   4. A thianghlimmi thil asi caah, tipil ing ciami lawng nih hman ding a si lai.
   5. Ordained hmumi pastor lawng nih Bawipa Zanriah pek khawh a si lai.

Then 10: Thitumnak (Marriage) 

Bible nih fiang tein a kan cawnpiak bang in, thitumnak cu pa le nu karlak (between a man 

and a woman) lawng ah tuah ding mi phung a si tiah kan zumh. Thitumnak cu nu pakhat le pa pakhat nih nun chung nguh in biakam an ser i an i fonhnak in a chuak mi a si. Pathian nih thluachuah a pek i aa dawh mi phung a si caah ṭhitumnak cu mi vialte nih ṭihzah upat ding a si. Bible cawnpiak ning in ṭhitumnak cu pa le nu karlak lawng ah tuah ding mi phung a si caah sinak aa khat mi—nu le nu, pa le pa ṭhitumnak (same-sex marriage) cu Bible he aa kalh tiah kan zumh. 

Matthai 19:4-6; Marka 10:6-9; 1 Korin 7:2-4; Efesa 5:22-31; Hebru 13:4. 

Then 11: Zohkhenhtu Tha Sinak (Stewardship) 

Pathian cu zeizong vialte sertu le ngeitu a si. Amah nih zeizong vialte a kan pek. A kan pekmi thil vialte ah damnak, ṭhawnnak, rumnak, fimthiamnak le zeidang thlarau laksawng vialte an i tel dih. Cu laksawng vialte hna caah, “zohkhenhtu tha” (steward) si ding le cu laksawng phunkipte cu Jesuh Khrih ram kauhnak caah hman ding hi, Pathian duhnak a si. Cucaah Pathian chawkengtu ṭha le zohkhentu ṭha kan sinak hnga, kan hmuhmi laksawng chung in, cheuhra cheukhat siseh, adangdang pekchanhnak in siseh, Khrihfabu rian le mission rianṭuan ding tibantuk hna hi, Khrihfabu nih aa sehchihmi (commitment) an si.

Then 12: Satan Kan Hmuhning (Satan) 

Satan hi a um taktakmi a si. Satan hi sualnak hram thawktu, a fimzermi, remlonak tuahtu, huatralnak tuahtu, lihchimnak, dinfellonak, tukforhtu, rawhralnak le chiatnak phunkip chuahpitu a si tiah kan pom. Asinain, Jesuh zumtu hna nih Satan tukforhnak cu zumhnak in tei khawh a si ti kan zumh (Num. 22:22; 2 Sam. 19:22; Job. 1:6, 2:2; Matt. 4:1-11; Mk. 4:15; Acts 5:3; Eph. 2:22; 6:12). 

Then 12: Jesuh Rat Thannak (The Second Coming) 

Jesuh Khrih cu thihnak in thawhter than a si hnu ah vancung ah a kai i Pa Pathian orhlei kam ah a thu. A biakam bang in vawlei ah sunparnak le lianhngannak he ni hmanung bik ah a rung tum than lai tiah kan zumh. Ni hmanung bik, Khrih vawlei ah a rat than tikah cun Khrih zumh bu in a thi cia mi hna cu sunparnak pum he thawhter than an si lai i, mi vialte cu Khrih nih dinnak in bia a ceih hna lai. Cun, thennak taktak cu tuah a si lai i, mi tha lo cu a dong ti lo mi sual phawtnak, le mi ding cu a dong ti lomi lawmhnak chung lut ding in biakhiah an si lai tiah kan zumh. 

Lamkaltu 7:55-56; 1 Peter 3:22; Hebru 12:2; Luka 21:27; Marka 13:26; Lamkaltu 1:11; 2 Korin 5:10; Biathlam 20:12-13; 1 Thessalon 4: 16-17; Matthai 25: 31-33; 35-41. 

Zumhnak Tlangpi Pasarih (Seven Doctrinal Statements)

FCBC Khrihfabu nih atanglei zumhnak tlangpi pasarih hna hi, aa tlaih. Hihi Protestant Khrihfabu tampi nih an i tlaihmi le pomhlawmmi a si.

1. Bible Nawlngeihnak (Supreme Authority of the Bible): Zumhnak lei cawnpiaknak le lamhmuh saknak ah Bible hi nawlngeihnak bik ah kan chiah (Matt 24:35; 1 Peter 1:23; 2 Tim 3:16-17).
2. Umhmun Khrihfabu Nawlngeihnak (Local Church Autonomy): FCBC Khrihfabu cu midang nih ukmi si loin, amah tein aa ukmi bu a si. Midang bu tangah um loin, mah tein aa ukmi Khrihfabu a si (Matt. 18:15-17; 1 Cor. 6:1-3).
3. Zumtu Dihlak Tlangbawi Sinak (Priesthood of All Believers): Hruaitu lawng si lo in zumtu dihlak tlangbawi kan si (1 Peter 2: 5-9; 1 Tim 5). 
4. Biakam Pahnih hmangmi kan si (Two Ordinances): A thianghlim mi tipil innak le Bawipa Zanriah a hmangmi kan si (Acts 2:41-47; 1 Cor 11:23-32). 
5. Pumpak Thlarau Zalawnnak (Individual Soul Liberty): Pumpak thlarau hi mah tein zalawnnak a ngei ciomi an si (Rom. 14:5-12). 
6. Khrihfabu le Cozah Thennak (Separation of Church and State): FCBC nih khrihfabu le vawlei cozah uknak a dang tein a thleidan. Bible ning in amah tein i hruainak le cawnpiaknak a ngeimi si caah vawlei uknak ah aa sawhkalh lai lo. Cu ve bantuk in vawlei uknak nih Khrihfabu ah a sawhkalh lai lo (Matt 22:15-22).
7. Khrihfabu Lutlai Buu Pahnih (Two Offices of the Church): Khrihfabu cu Pastor le Khrihfa Upa nih a bik in hruai ding a si (1 Tim. 3:1-13; Titus 1-2).

Pehtlaihnak (Affiliation) 

FCBC cu Pathian Bia, Bible Cawnpiaknak aa tlaihmi a si. Jesuh Khrih cu a lu ah chiah in, zalong tein amah tein aa hruaimi le Pathian rian tuanmi a si. Asinain, aa tinhmi a khen khawh nakhnga le Pathian Thawngtha phuannak le zumtu karhnak ding caah, zumhning le aa khatmi khrihfabu he rian a tuanti lai. Cucaah, Chin Baptist Churches (USA), Southern Baptist Convention (SBC), Missouri Chin Christians Fellowship (MCCF), le CBCUSA Midwest Area he pehtlaihnak a ngei. Cun, FCBC tinhmi tlaihtung le pomning he a khat mi bu dang ah FCBC cu phungfek in pehtlaihnak a ngei kho lai. Pehtlaihnak cu tawlrelbu nih a ceih lai i a cohlan ah cun bupi tonnak ah a chuah pi lai i bupi tonnak nih a cohlan hnu lawng ah tuah a si lai.